बुधवार, 17 फ़रवरी 2016

सरग के दूआरी दाई-ददा


दाई - ददा 
--------------------------------------
दाई-ददा ले मिलय आसिर्बाद
अऊ सियान ले मिले गियान
जिनगी म झन आवय दुख
देवव तुमन ये बात के धियान

हमर बर दुख पीरा सहईया
सब करव मान अऊ सम्मान
येकर मन के मया दुलार
मेहनत तियाग समरपन ल जान

सरग के दूआरी हे दाई-ददा
दुनो के चरण ल पखारंव
बुढ़ापा म सहारा बन के
सुख अऊ सांति ले संवारव

झन जा मथुरा कासी तीरथ
इंकर चरन म हे चारो धाम
दुनो के असिस आसिरबाद ले
बनथे सब के बिगड़े काम

दुनिया म कतको देवता ल मान
धरती के इही मन हे भगवान
वेद पुरान रामायण गीता सास्त्र
सबो जगा हवय येकर परमान
------------------------------------------
रचना - देव हीरा लहरी
चंदखुरी फार्म मंदिर हसौद
रइपुर छत्तीसगढ़
मोबा :- 9770330338

दोगला सरकार


दोगला सरकार
------------------------------
80 रुपिया गोंदली के किलो
200 रुपिया राहेर दार कराये
अच्छा दिन के वादा करे
दोगला सरकार कहाये

पइसा खा खा के दोगला मन ह
घुसघुस ले मोटाए
फांसी अरो के किसान मरत हे
लइका मन चुचवाए

करिया पइसा लांहु कहिके
माइक म बड़ चिच्याये
जब लाये के पारी अइस
6000 करोड़ बाहिर भेजवाये

डिजिटल इंडिया कहिके
परदेसिया ल नेवता दे आए
बिदेश घूम घूम के
कतको पइसा ल तैं खपाए

मनखे मन लड़त मरत हे
तैं रंग रंग के फ़ोटू खिंचवाए
गरीब के पहिरे बर कपड़ा नई हे
लाखो रुपिया के तै शूट खिलवाए

नवा नवा बीमा योजना
तैं हर चलाए
स्वच्छ भारत अभियान के नाव म
जम्मो लोगन ल भरमाए

जाति धरम नाव लेके
मनखे मनखे ल लड़वाए
कंहू गोधरा कांड।
त कंहू दादरी कांड करवाए

दे के पंदौवली किसम किसम के
घोटाला तैं कराए
अच्छा दिन के वादा करे
दोगला सरकार तेन कहाए
-------------------------------
जय जोहार जबर गोहार 
छत्तीसगढ़ीया क्रांति सेना